ތެލުގެ އަގު އިންތިހާޔަށް ބޮޑެވެ

ތެލުގެ އަގު މާބޮޑެވެ.

ތިޔަމަލެއްގެ ޖާދޫގައި ޖެހި ހިތް ހަލާކުވާން ގާތްވެއްޖެ އެވެ.

ޅިޔައެޅި މި އަޅާގެ ޖިސްމު ހަލާކުވެދާނެއެވެ.

ބިޔަ ފުރާޅެއްކަހަލަ މަލާއެވެ.

ހިޔަފަހަރު ނުބުންޏަސް ކަލާގެ ހިޔާވަހިކަމުގެ ދަށަށް މިއަޅާ ވައްދާދޭށެވެ.

ފުރަތަމަފަހަރު ކަލާ ފެނިލުމުންވެސް

ފުރަމޭގައި ހީބިހި ނަގައިގެން ދިޔައެވެ.

ކުރެހުމަކުންވެސް ކަލާގެ ކޯތާފަތުގައި ހުރިވަރަށް ކުލައެއް ފެނިފައެއް މިއަޅާނެތެވެ.

ބުރަމަސައްކަތް ކޮށްގެންވެސް ކަލާޔާ ވައިއެޅެން ބޭނުމެވެ.

ހުދު ރީތި ރިޔަލެއްފަދަ ކަމަނާއެވެ.

ކުރުމުއްދަތަކަށްނަމަވެސް ކަލާގެ ރިޔަލުގައި ވައިއަޅުވާލަދިނުމުގެ އިޛްނަ

ފުރަތަމަ ނިކަމެތި އަޅާޔަށް ދެއްވާށެވެ.

އޮޑި ދުވަންޏާވެސް އެނގޭނީ އޭރުންތާއެވެ.

ދެން މިހެން އާދޭހުގެ ގުލްޒާރެއްގައި ވިނަކޮށަން ހުންނަންވީތޯއެވެ.

ފެންފޮތީން ޖިސްމު އެކީއެކައްޗަކަށް ފެންލެވިދާނެއެވެ.

ކެއްނުކުރެވިގެންގޮސް 'ދެންނުވާނޭ' ބުނާހިސާބަށް ކަންތައް ހިނގައިދާނެއެވެ.

ބެންކުން ލޯނުނަގައިގެންވެސް ކަލާޔަށް ގަނޑުވަރެއް ބިނާކޮށް ދޭނަމެވެ.

'އާނ' ބަސް ބުނެދެއްވާށެވެ. ކީ ރާގަކަށް ލަވަ ހަދާދޭނަމެވެ.

ދުއްޕާނާ ވޭނުން މިއަޅާ ނުރޮއްވާށެވެ.

ފުއްޕާމޭގެ ޝިކާރައަކަށް މިއަޅާ ވެދާނެއެވެ.

ރަކިކޮށްކޮށް އަޅާގެ ހަތަރުއަނގޮޅި ބައްދާނުލާށެވެ.

ވަކިރީތި ދެވަނަ އެއްޗެއް ކަލާ ފިޔަވައި މި ބިންމައްޗަކު ނެތެވެ.

ހުސްއަތާހުރެ މިއަޅާ މިހިރަ ނިމި ހިނގައި ދަނީއެވެ.

ކަލާގެ ސޫރަ އަޅާގެ ހިތުގައި ވަކި ހިއްޕާލައިފިއެވެ.

އަލާނުކެނޑި ހަނދާނުގައި އިންނަތާ ދޮޅުއަހަރު ވަނީއެވެ.

ކަލާގެ ޖަވާބަކަށް އިންތިޒާރުކޮށްކޮށް ގޮސް މީނދަ ހުލިވަނީއެވެ.

ރަލާ، ދުމާ ދުފުމާ އާދަޔަކަށް ވެއްޖެއެވެ.

މި ކިހާބޮޑު ބަލާވެރިކަމެއް ހެއްޔެވެ؟

ޖިސްމު ނެތިގެންގޮސް ހަފުސްވެޔޭ ކިޔާއަޑު ކަލާ އަހަމު ހެއްޔެވެ.

ފިސްވެ ވިރާނާވެ، މިއަޅާ މީނދީ މިހާރު އެހެންވެފައެވެ.

ކިސްމަތުގައި ހުރިގޮތް ކަންނޭނގެއެވެ.

ލިސްޓުކޮށްފައިނެތް އެންމެ ގުނަވަނެއްވެސް މިހާރަކު ނެތެވެ.

އެހެންނަމަވެސް ހިތްކީ ވަރެއް މިއަޅާ ދުލެއްނުކުރަމެވެ.

ފީ ކުކުޅެއްފަދަ އަޑުރީތި ކަމަނާއެވެ.

ބިސްމަޅިދުއްވައިގެން ނަމަވެސް ކަލާ ހޯދާނަމެވެ.

މީ ހިތް ބުނާ އެއްޗެކެވެ.

ޖިސްމަކު އެހާ ދަމެއް މިހާރަކު ނެތެވެ.

ކުރުނޫން ދިގު އިންތިޒާރެއް މިހާރު ކަލާޔައްޓަކައި ކުރެވިއްޖެއެވެ.

ބުރުނީން ފުރައި ތުރުކީއަށް ކަލާދިޔަޔަސް ދެންހެވެވެ.

ބުރިންދުންއަރުވަމުން ކަލާފަހަތުން ދެން ދުއްވޭކަށް ނެތެވެ.

ބޭހަށްވުރެ ތެލުގެއަގު މިހާރު ބޮޑެވެ!

*****